ԼԱՍՏԻՎԵՐ

Տավուշի մարզը հայտնի է իր չքնաղ բնությամբ: Այստեղ բնական հուշարձանները գեղեցիկ ու անկրկնելի հմայք են պատճառում այցելուներին:

Լաստիվերը գտնվում է Տավուշի մարզի Ենոքավան գյուղից 7 կմ հեռավորության վրա, խոր կիրճում, Խաչաղբյուր գետի ափին:

Լաստիվեր հասնելու համար Ենոքավան գյուղից մեքենայով կարող եք երթևեկել 3.5 կմ, ապա ևս այդչափ ոտքով պետք է քայլեք կուսական անտառներով:

Լաստիվերը վայր, է, ուր բնության անկրկնելի պատկերներով հիանալու հետ մեկտեղ, կարող եք այցելել նաև միջնադարյան անապատականների կացարան-քարանձավները, ուր մարդիկ հարյուրամյակներ շարունակ առանձնացած աշխարհից՝ հոգևոր գործունեությամբ են զբաղվել:

Այստեղ սակայն, մարդիկ բնակվել են դեռ վաղնջական շրջանից, հաճախ, օտար ասպատակությունների ժամանակ ապաստան գտել քարանձավներում: Այստեղ են նաև  ցարական հետապնդումներից ապաստանել հայ ֆիդայիներից շատերը:

Քարանձավը կրկնահարկ է, բաղկացած մի քանի սենյակներից: Հարկերի միջև կապն ապահովված է ժայռափոր թունելով:

Այս քարանձավում 1970-ական թվականներին քանդակագործ Բենիկ Պետրոսյանը գեղեցիկ պատկերներ է քանդակել, կանացի և տղամարդու պատկերներ, ցլի գլուխ, քարայծի գլուխ և այլն: Քարանձավի մուտքի մոտ հսկում է միջնադարյան խաչքարը:

Լաստիվերի քարանձավները բարձր կիրճի եզրին են, և մարդիկ նրանց հասնելու համար կիրճի ժայռերի մեջ գերաններ են ամրացրել, այդ գերանները հյուսել խաղողի որդերով՝ լաստերով, ստեղծելով աստիճանահարթակ՝ քարանձավ բարձրանալու համար: Այստեղից էլ՝ տեղանքի անվանումն է ծագել՝ Լաստիվեր:

Քարանձավներից ցած թավ ու սաղարթախիտ անտառներ են, ձորով հոսում է Խաչաղբյուր գետակը, որ բարձրաբերձ սարերից իջնելով, ձորակի ժայռերի մեջ ասես թռչկոտում է՝ գեղեցիկ ջրվեժներ առաջացնելով՝ հոսում դեպի Աղստև:

Այս ջրվեժների հարևանությամբ այժմ հանգստի գոտի է գործում: Մարդու ձեռքը բնությանը համահունչ դեկորատիվ պատկերներ է կերտել. Ծառերի վրա տնակներ ու խրճիթներ,  որոնք գիշերակացի համար օթևան են ծառայում Լաստիվեր այցելած զբոսաշրջիկների համար:

Մի խոսքով, բնության գրկում հանգիստ անցկացնելու համար այստեղ առկա է ամեն ինչ. Քարանձավներ, արագահոս լեռնային գետակ, ջրվեժներ, փայտե խրճիթներ, և իհարկե՝ Տավուշի թավ անտառները…

 

Վահէ Լոռենց

 

 

 

 

 

Facebooktwittergoogle_pluslinkedin